Comune di Bolognetta
Comune di
Bolognetta
Città metropolitana di Palermo

Poesia dell’ex sindaco dott. Gaspare Greco

AGGHIASTRU
1982
Quannu lu granni Diu fici lu criatu
‘nta cincu jorna fici affaticatu,
cu Cina, Russia, America e Inghilterra
lu novantanovi pircentu di la terra.

E di sabatu fici lu paisi d’Agghiastru
comu pi a lu munnu darici cchiù lustru:
d’accussì ci fu misa Casachedda
di tutti li muntagni la cchiù bedda.

Lu fici felici, lu fici c’un surrisu
pinsannu ca dumani era riposu.
Eccu picchì metti briu, quarìa e attizza
a cu a 1’Agghiastru dimura nna stizza.

Lu suli la matina a lu spuntari
cu li sò raggi lu va accarízzari;
di notti: la luna e stiddi stralucenti
li nnamurati fannu cchiù ardenti.

Prima Agghiastru, Bolognetta da cent’anni
ma lu tò nnomu è lu stessu sulenni e granni.
Si granni di cori, t’onura 1’aggenti
ca godi pi la tò natura assai pussenti.

La varba si fa ancora nta lu varberi,
lu scarparu fa ancora lu sò misteri
e, anchi si nun c’è scola, nun c’è spitali
e la tò genti leggi picca lu giornali,

sutta li tò occhi sbuccianu li ciuri
e li tò tramunti fannu nasciri 1’amuri.
Bolognetta, sì na terra ca pari nata
di lu capricciu di na bona fata.

L’aggenti tò ringrazia lu Signuri
ca di terra sì lu megghiu ciuri
e si un figghiu tò, luntanu sta di tia,
cririmi, malatu cari di nustalgia.

‘Nta stu paisi nni sintemu tutti amici;
la nostra patruna avissi a essiri la PACI.
Picchì unni c’è paci chidda è terra ricca
anchi si sapemu ca la mala erba mai sicca.

Caru Paisi miu, Paisi di lu me cori!!
Senti li figghi toi: senti sti paroli:
Priàmu Santa Maria, Sant’Antoniu e li Santi
pi arrimuddarici la crozza a li tò guvirnanti.

Santu Paisi, a tia minchinu e mi sprufunnu
e stasira lu cunfessu a tuttu lu munnu:
mi facisti fari nicu e picciriddu
lu cori quantu un filu di capiddu.

Stu cori chi chianci, spasima e parra
pi menzu di li noti di sta chitarra,
ma lu cori è stancu: pi ora ripusamu
e n’atr’annu,si Diu voli, nni parramu.

(Rino Greco)

Top